اهي كلها أيام و تعدي
وحترجع من تاني البسمة
والبيت العامر للضيفان
ونسة احباب زي النسمة.
.....
وأطفال شايلين علبة ألوان
يرسموا في الخاطر كم رسمه
ويرفرف فوق علم السودان
ياوطني تعيش دايما أسمى
.
دي عيون ماليانه كلام وأحلام
وقلوبنا المليانه تحدي
بنعوّض أحزانا الجاتنا
والسكة الجابت حتودي
.
ونعيش بسلام من غير آلام
نتماسك يدك في يدي
ما بتكسر شوكتنا الأيام
أهي كلها أيام و تعدي
.
لو غابت صورتك من العين..
جوانا تغني مواويلك
جوانا ملامحك في الوجدان
وبتعيش جوانا تفاصيلك
.
.......
كل االالم تصبح ذكرى
ونحقق بالعمل الآمال
نمسح من كل قلوبنا الهم
والدمعة الفي خد الأطفال
.
وحنبني الاتكسر كله
ونعلم بالحب الأجيال
الوطن العايشين في ضله
ده محال حنسيبو يضيع ده محال
.
محفوره الذكرى الفي بلادنا
جوانا بكلّ تفاصيلا
البيت والشارع و الأصحاب
والعمر الرويان بي نيلا
.
راجعين يوم باكر بالآمال
والرحلة البيناتنا طويلة
والعازة بتمسح دمعاتا
بالغنية الغناها خليلا
.
لو كل الأبواب مقفوله
جوانا أمل لي باب مفتوح
حنعيش أيام فيها بتشفى
بالكلمة الطيبة جروح الروح
.
ونقول للناس نحن رجعنا
ونبنيك يا بلدي صروح وصروح
وترجع بالفرحة عصافريك
وتغرّد تاني بلابل الدوح
